Is é is cuspóir don mhodúl seo ná go mbeidh eolas leathan ag an mac léinn ar nua-litríocht na Gaeilge, na huirlisí anailíse cuí aige/aici, agus tuiscint dhomhain aige/aici ar an nua-litríocht i gcomhthéacs teagaisc agus foghlama gníomhaí. Is i gcomhthéacsanna criticiúla agus stairiúla faoi seach a bheidh an t-eolas agus an tuiscint sin. Ar chríochnú an mhodúil dó/di, beidh eolas cuimsitheach ag an mac léinn ar na téacsanna príomha i seánraí an úrscéil, na filíochta, an ghearrscéil agus na drámaíochta faoi seach. Agus na hinniúlachtaí riachtanacha cuí aige/aici chuige, beidh sé de chumas aige/aici nua-litríocht na Gaeilge a mheas. Beidh eolas domhain ag an mac léinn ar cheisteanna ábhair, stíle agus modhanna liteartha i réimsí éagsúla a bhaineann le seánraí nua-litríocht na Gaeilge. Beidh sé/sí láneolgaiseach maidir leis an gcoibhneas idir an nua-litríocht agus cúinsí forbartha agus stairiúla na teanga. Ar chríochnú an mhodúil dó/di, beidh an mac léinn ar an eolas faoi thoisí iasachta agus idirnáisiúnta a bhaineann le nua-litríocht na Gaeilge agus beidh tuiscint aige/aici orthu dá réir, idir mhionteangacha agus mhórteangacha an domhain. Maidir le lorg na n-ardán digiteach agus leictreonach, beidh an mac léinn ar an eolas faoin tionchar a d'imir na hardáin siúd ar fhorbairt nua-litríocht na Gaeilge, agus ar cheist thionchar na teicneolaíochta ar ábhar agus stíl liteartha.

Sa mhodúl seo, déanfar iniúchadh ar théacsanna, léirmheasanna critice, díospóireachtaí comhaimseartha agus ábhar faoi leith i nua-litríocht na Gaeilge sa tréimhse idir 1930 agus 2010. Cíorfar úrscéala, gearrscéalta, filíocht agus drámaí le scríbhneoirí Gaeltachta agus Galltachta, agus scrúdófar aistriú téacsanna ó theangacha éagsúla na hEorpa go Gaeilge. Scrúdófar an cúlra agus an comhthéacs a bhaineann le forbairt nua-litríocht na Gaeilge agus lorg Athbheochan na Gaeilge ar an litríocht. Déanfar comparáid idir nua-litríocht ón nGaeltacht agus ón nGalltacht, agus déanfar grinneadh ar thábhacht cheist na teanga chomh fada le forbairt nua-litríocht na Gaeilge. Pléifear tábhacht na dtraidisiún liteartha agus béil ar théacsanna faoi leith, agus ar an tionchar a d'imir nua-aoiseachas na hEorpa agus na Rúise ar an nua-litriocht sin. I measc na n-ábhar a phléifear, beidh cúrsaí inscne, aicme agus teanga.

Nuair a bheidh an modúl seo curtha i gcrích ag na mic léinn go sásúil, beidh siad in ann: - eolas cuimsitheach a léiriú ar an nua-litríocht, idir úrscéalta, ghearrscéalta, dhrámaí agus fhilíocht - tuiscint a léiriú ar áit na dtéacsanna seo, ar a dtréithe agus a gcáilíocht liteartha trí bhíthin an phlé - téacsanna a mheas agus tátal a bhaint astu ó pheirspictíochtaí ilchineálacha a ndeachthas i ngleic leo sna léachtaí, san ábhar criticiúil agus san fhoghlaim ghníomhach - nua-litríocht na Gaeilge a mheas as cur chuige agus frámaí tagartha cuí a chur i bhfeidhm

- teicnící a mheas a bhaineann leis an scríbhneoireacht chruthaitheach sna seánraí de chuid nua-litríocht na Gaeilge a ndeachthas i ngleic leo sa mhodúl

Trí léachtaí, plé ag na seimineáir agus ábhar taighde-bhunaithe a mhúinfear an modúl. Foghlaimeoidh na mic léinn as an éisteacht ghéar agus dul i ngleic leis na léachtaí; as an ábhar príomha agus tánaisteach a léamh (idir ábhar éigeantach, molta agus leictreonach); agus trí phróiseas na sintéise a chur ag obair go comhfhiosach. Foghlaimeoidh na mic léinn as sainábhar na seimineár a phlé lena gcomhpháirtithe, agus tabharfar treoir dóibh ar an bpróiseas sin. Iarrfar ar mhic léinn dialann mhachnaimh a choimeád ar an taithí fhoghlama. Is é an taighde a dhéanfaidh an mac léinn as a stuaim féin a chuimseoidh roinnt mhaith d'ualach oibre an mhodúil.